Chinthuzi: Tsamba la mchezo
Unduna wa maboma ang’ono wauza khonsolo ya mzinda wa Lilongwe (LCC) kuti ileke ntchito yotchetcha chimanga mminda ya anthu ena mumzindawu mpaka nkhaniyi itaunikidwa bwino lomwe.
Izi zadza anthu okhala mumzindawu, maka m’madera a Area 43 ndi 11,atadandaula ndi zimene inachita khonsoloyi lachitatu potchetcha chimanga chokulakula mminda yawo, potengera kuti malamulo sakulora anthuwa kulima mmapuloti amderali.
Koma mukalata imene wasayinira mlembi wa mu unduna wa maboma ang’ono, a James Chiusiwa, boma lati kutsata malamulo kuli apo,ilo lamva kudandaula kwa anthuwa, poganiziranso kuti mwina dziko lino likhoza kukhala ndi chakudya chochepa malinga ndi m’mene nyengo ikuyendera.
Lachitatu, m’modzi mwa akuluakulu a khonsolo ya mzinda wa Lilongwe,a Allan Domingo,anati khonsoloyo yatchetcha kale chimanga mminda yokwana khumi,malinga ndi malamulo awo.
