Ntchito yodzipezera malo mu ndime yadziko lonse mumpikisano wa 1 NICO Netball m’chigawo chapakati tsopano yafika pachimake pamene matimu a CIVO Nets ndi Blue Eagles Sisters afika mu ndime yotsiriza.
Timu ya Blue Eagles ndiyo inali yoyamba kufika mu ndime yotsirizayi itagonjetsa Young Eagles yomwe ndi timu yake yaing’ono ndi zigoli 50 ku 41 pomwe CIVO yagonjetsa MDF Lionesses ndi zigoli 55 kwa 50.
Padakali pano, Young Eagles ndi MDF akusewera mu ndime yofuna malo achitatu, isanayambe ndime yotsirizayo pomwe katswiri atenge chikho ndi ndalama zokwana K1 million.
Matimu atatu ndi omwe adzigulire malo mu ndime yadziko lonseyi m’chigawo chapakati ndipo adzakasewera ndi matimu ena akummwera komanso kumpoto.
