Undongosi wakisu iki Dr Lazarus Chakwera ikakisye ikomiti ya makambala iyakwendesya ulubatiko lwa mfwa ya gwakibili ku ndongosi wakisu iki Dr. Saulos Chilima.
Ikambala lwakufumusya amasyu Moses Kunkuyu yo ayobaga isi ulu abalinganiaga abina Malawi mumo ifindu fiyilile ukupalamasya nifwa ya Chilima.
Kunkuyu atile mu komiti iyi galimo amakambala kalongo gago gikulongosiwa nikambala lya sya bwanaloli Titus Mvalo.
Mu komiti iyi, balimo kangi abasimbi abakulumba aba fipani fya UTM na MCP, mama Patricia Kaliati na Eisenhower Mkaka.
Amakambala ga mu komiti iyi go aga: Harry Mkandawire, ikambala lya kifigililo, Michael Usi,ikambala lya sya fipeliwa, Simplex Chithyola Banda, ikambala lya sya kyuma, Nancy Tembo, ikambala lyakuketa amasyu ga panja, Khumbize Kandodo Chiponda, ikambala lya sya bumi, Richard Chimwendo Banda, ikambala lyakuketa isya maboma amanandi ni kitukuko kya ntwaya, Ken Zikhale Ng’oma, ikambala lya sya nkisu, Vera Kamtukule, ikambala lyakukoopa abahesya, Moses Kunkuyu ikambala lyakufumusya amasyu kangi Jacob Hara, ikambala lya mendelo ni mbombo.
