Wasilikali wa charo chino wa (MDF) wachali kupenja ndege iyo yikanyamula wachiwiri kwa mrongozgi wa charo chino Dr. Saulos Klaus Chilima na walala walala wanyakhe wankhondi na wanayi.
Wasilikali awa ndege iyi wakuyipenjera mu nguyi ya Chikangawa iyo yili m’boma la Mzimba pakuti malipoti ghakufumira ku wusilikali ghakuwoneska kuti ndege iyi yasowera malo gheneghagha.
Dr. Chilima wakawa pa wulendo wakuluta ku nyifwa ya nkhwantha pa makani gha vya malango wa Raphael Kasambala ku Mzuzu awo walikusunga mayiro kukaya kwawo ku Nkhatabay. Wa Kasambala wakatewetapo nga nduna yavya wulunji kweniso wakuchiska boma pa makani gha vya malango.
Ndenge iyo yikanyamula wachiwiri kwa mrongozgi uyu yikafika pa lwaza lwa ndege la Mzuzu na nyengo ya 2 minisi pasiti 10 namulenji ndipo chifukwa cha mphepo ziheni pa chiwanja ichi, ndege iyi yikatondeka kudeka.
Pasono pano mrongozgi wa charo chino Dr. Lazarus Chakwera waromba vyalo vya America, Norway, UK na Israel kuti vinjilirepo pakupeleka wovwiri pa makani ghakusanga ndege iyi.
Wanyakhe mwa walala walala awo wakawa nawo mu ndege iyi mayiro mba Shanil Dzimbiri, Abdul Lapukeni, Lukas Kapheni, Chisomo Chimaneni, Gloria Mtukule, Colonel Sambalopa, Major Aidini, kweniso Major Selemani.
Apasono wasilikali pamoza na wapolisi wakunyamuka wakuluta ku Thungwa kukalutilizga kupenja ndege iyi mchigawa chenechichi cha chikangawa.
Wakulemba: Jackson Sichali
